परदेशात शिक्षणासाठी गेलेल्या विद्यार्थ्यांना मतदानासाठी प्रणाली विकसित करण्यात यावी;प्रा.मकरंद पाटील

नंदुरबार जिल्हा प्रतिनिधी/ प्रा. गणेश सोनवणे 

लोकसभा-2024 निवडणुकीसाठी परदेशात शिकत असलेल्या भारतीय विद्यार्थ्यांना मतदानाचा अधिकार प्राप्त करून देण्यासाठी योग्य प्रणाली विकसित करून मतदानाचा हक्क बजावता यावा यासाठी विनंती पत्र मुख्य निवडणूक आयुक्तांना भारतीय जनता पक्षाचे जिल्हा उपाध्यक्ष तथा शहादा तालुका खरेदी विक्री संघाचे चेअरमन प्रा मकरंद पाटील यांनी पाठवले आहे. 

याबाबत भारताचे मुख्य निवडणूक आयुक्तांसह पंतप्रधान व केंद्रीय गृहमंत्री भारत सरकार यांना प्रा.मकरंद पाटील यांनी दिलेल्या लेखी पत्राचा आशय असा,परदेशात शिकत असलेल्या आमच्या भारतीय विद्यार्थ्यांच्या वतीने मी विनंती करतो की, या विद्यार्थ्यांना लोकसभा-2024 निवडणुकीत मतदानाचा हक्क वापरता यावा यासाठी एक अत्याधुनिक मतदान रचना विकसित करावी. माझ्या मतदार संघातील अनेक विद्यार्थी परदेशातील विद्यापीठांमध्ये उच्च शिक्षण घेत आहेत आणि त्यापैकी काहींनी मला याबाबत योग्य तो पाठपुरावा करण्यास सांगितले आहे. हे विद्यार्थी मतदानासाठी भारतात येऊ शकत नसल्यामुळे आपल्या देशाला मतदानाची जास्तीत जास्त टक्केवारी गाठायची असेल तर या क्षेत्रातही प्रगती करणे आवश्यक आहे.तसेच परदेशातील विद्यार्थ्यांची मतेही महत्त्वाची आहेत. त्यांना भारताच्या संपर्कात राहून आणि भारतीय लोकशाहीबद्दल स्वारस्य व्यक्त करताना पाहून आपणा सर्वांना आनंद होणे स्वाभाविक आहे.अमृत कालच्या वर्षांमध्ये, आपल्या देशाची लोकशाही कायदेशीररित्या सर्वसमावेशक आहे याची खात्री करण्यासाठी परदेशात शिकणाऱ्या भारतीय विद्यार्थ्यांसाठी एक अत्याधुनिक मतदान फ्रेमवर्क तयार करून मतदानाची टक्केवारी वाढावी.देशाच्या प्रगतीसाठी या संदर्भात आपल्या सकारात्मक प्रयत्नांची अपेक्षा आहे असे प्रा मकरंद पाटील यांनी पाठवलेल्या पत्रात नमूद करण्यात आले आहे .